Zërat rreth të ardhmes së Dusan Vlahović vazhdojnë të shtohen dhe këtë herë në qendër të skenës del sërish Milani. Sipas gazetarit të njohur italian Matteo Moretto, Massimiliano Allegri nuk ka hequr dorë nga ideja për ta pasur sulmuesin serb nën urdhrat e tij. Një dëshirë e fortë, e ndarë jo vetëm nga trajneri, por edhe nga e gjithë drejtoria kuqezi, që e sheh Vlahović-in si profilin ideal për të udhëhequr sulmin e së ardhmes.
Moretto ka qenë i qartë në deklaratat e tij: aktualisht nuk ka firma, por ekziston një marrëveshje verbale dhe një vullnet i përbashkët për të eksploruar këtë pistë. Ideja e Milanit është ambicioze dhe delikate njëkohësisht: të tentojë transferimin e Vlahović-it me parametër zero, duke shfrytëzuar çdo hapësirë të mundshme në aspektin kontraktual.
Vlahović, profili i preferuar i Allegrit
Massimiliano Allegri e njeh shumë mirë Vlahović-in dhe cilësitë e tij. Forcë fizike, instinkt goli dhe aftësi për të mbajtur peshën e repartit ofensiv janë karakteristika që e bëjnë serbin një objektiv të lakmuar. Për Milanin, një sulmues i këtij niveli do të përfaqësonte një hap cilësor të madh, sidomos në funksion të objektivave europiane.
Vlahović luan te Juventusi që nga janari i vitit 2022, kur bardhezinjtë e blenë nga Fiorentina për rreth 70 milionë euro. Sot, pas disa sezoneve me ulje-ngritje, e ardhmja e tij mbetet e hapur. Milani po vëzhgon, Allegri insiston dhe merkatoja e verës premton të jetë e nxehtë. Nëse kushtet do të përputhen, kjo mund të shndërrohet në një nga operacionet më të bujshme të viteve të fundit në Serie A.